ஜ۩ஜܓܨوبلاگ ایوقܓܨஜ۩ஜ

حيدربابا ، کهليک لروْن اوچاندا               کوْل ديبينَّن دوْشان قالخوب ، قاچاندا

باخچالارون چيچکلنوْب ، آچاندا               بيزدن ده بير موْمکوْن اوْلسا ياد ائله

                                  آچيلميان اوْرکلرى شاد ائله

بايرام يئلى چارداخلارى ييخاندا              نوْروز گوْلى ، قارچيچکى ، چيخاندا

آغ بولوتلار کؤينکلرين سيخاندا               بيزدن ده بير ياد ائلييه ن ساغ اوْلسون

                           دردلريميز قوْى ديّکلسين ، داغ اوْلسون

حيدربابا ، گوْن دالووى داغلاسين !         اوْزوْن گوْلسوْن ، بولاخلارون آغلاسين !

اوشاخلارون بيردسته گوْل باغلاسين       يئل گلنده ، وئر گتيرسين بويانا

                                بلکه منيم ياتميش بختيم اوْيانا

حيدربابا ،‌ سنوْن اوْزوْن آغ اوْلسون !       دؤرت بير يانون بولاغ اوْلسون باغ اوْلسون !

بيزدن سوْرا سنوْن باشون ساغ اوْلسون  دوْنيا قضوْ-قدر ، اؤلوْم-ايتيمدى

                               دوْنيا بوْيى اوْغولسوزدى ، يئتيمدى

حيدربابا ، يوْلوم سنَّن کج اوْلدى           عؤمروْم کئچدى ، گلممه ديم ، گئج اوْلدى

هئچ بيلمه ديم گؤزللروْن نئج اوْلدى       بيلمزيديم دؤنگه لر وار ،‌ دؤنوْم وار

                             ايتگين ليک وار ، آيريليق وار ، اوْلوْم وار